Minaliit ni dating Surigao del Norte Rep. Robert Ace Barbers an naglalakop na “unsigned affidavit” kan 18 indibidwal na nagpabistong dating miyembro kan Philippine Marines, na inapod ining “script of a drama skit” na may katuyuhan sanang raoton an reputasyon.
Pig-engayar ni Barbers, na nagsirbing lead chair kan House Quad Committee, an abogado kan grupo na si Atty. Levi Baligod, nganing pirmahan asin ipanotaryo an mga pahayag kan saiyang mga kliyente nganing magkaigwa nin legal na gabat.
Segun ki Barbers, an sarong dai pinirmahan na affidavit an pigkokonsiderar na sarong “scrap of paper” o basura sana sa irarom kan ley.
Kinuwestiyon ni Barbers kun tunay na mga suldados an mga naglutang, asin inapod sindang “mercenaries” o mga trabahador na pig-aarkila na naghahanap sana nin ganansya.
Iniladawan kan dating mambabatas an mga alegasyon bilang sarong “zarzuela” na may katuyuhan na ilihis an atensyon kan publiko sa ICC proceedings laban ki dating Presidente Rodrigo Duterte asin an impeachment track ni Bise Presidente Sara Duterte.
Nagpatanid man an mga lideres kan Kamara na an pagluwas kan siring na mga warang basehan na akusasyon igwa nin seryosong epekto sa integridad kan mga institusyon asin sa personal na reputasyon kan mga opisyales na imbuelto sa isyu.
