LEGAZPI CITY—Liwat na pigbuksan kasoodmang banggi, Oktubre 29, an two-lane na tinampo sa kahalabaan kan Barangay Bigaa, Legazpi City nganing mabawasan an gabat na trapiko ngonian na Nobyembre hasta Disyembre.
Segun ki Barangay Bigaa Kapitan Koko Arienda, sa intrevista kan Bombo Radyo Legazpi, naki-olay sinda sa kontraktor kan pigsasagibong road reblocking na gibohon munang two-lane an tinampo nganing dae madificilan an mga motorista na mag-agi sa nasabing lugar.
Maray man suboot na kaolay an mga kontraktor siring na man sa tabang ni Legazpi City Mayor Hisham Ismail magin kan saiyang kapwa barangay officials, kun saen nagsagibo man sinda nin pag-damping sa tinampo nganing dagos nang makaagi an mga behikulo digdi.
Dugang ni Arienda na posibleng bukas an nasabing two-lane na tinampo sagkod Disyembre ngonian na taon bago an pagpuon giraray kan road reblocking.
