Naglunsar nin sarong importanteng meeting an Turkey ngani na mapugolan an lalong naglalang tensyon sa Africa huli sa iwal kan magkataning na nasyun na Ethiopia asin Somalia.
Nagpuon an tensyon makalihis na maglaog sa sarong agreement an Ethiopia sa rehiyon kan Somaliland.
Sa nasabing agreement, tutugotan kan gobyerno kan Somaliland na magtugdok nin base militar an Ethiopia sa laog kan 20km kan saindang teritoryo.
Karibay kaan an pormal na pagbisto kan Ethiopia sa teritoryo asin soberanya kan lugar.
Alagad dae ini nauyonan kan gobyerno kan Somalia lalo pang pigkokonsidera nindang parte kan saindang teritoryo an Somaliland na taong 1991 sana kan mahali sa saindang kontrol.
Mahigot an naging huma kan Somalia na dae sinda magduduwa-duwang isip na magdeklara nin gera kung idadagos kan Ethiopia an agreement na saro suboot na malinaw na pangingiaram sa saindang teritoryo.
Ngani na maibitaran an paglala pa kan tensyon, magkasuway na kinaulay ni Turkish Foreign Minister Hakan Fidan sinda Ethiopian Foreign Minister Taye Atske Selassie asin Somalia Foreign Minister Ahmed Moallim Fiqi.
Sa ngunyan nagpapadagos pa an pag-uulay kan tolong nasyun na planong magbilog nin agreement ngani na maibitaran an gera.
Magigirumduman na haloy ng may sadiring kultura asin gobyerno an Somaliland alagad wara nin ibang nasyun na nagkokonsidera kaini bilang sarong totoong nasyun.
