LEGAZPI CITY – Inangat kan alkalde kan banwaan kan Tiwi, Albay na gibuhong-inspirasyon an dakol na senior citizens kaibanan na an mga centenarian na nagpabakuna na kontra sa COVID-19.
Sa intrevista kan Bombo Radyo Legazpi ki Mayor Jaime Villanueva, ikinaoogmang maray an desisyon kan tulong 100-anyos nang mga gurang na nagpabakuna gamit an AstraZeneca vaccine sa Brgy. Tigbi.
Saro sa mga ini an mismong nagpasiring vaccination center mantang dinuman na sana sa harong kan vaccinator an iba pa.
Pigsurvey man muna an mga ini antes na magresibe kan bakuna huli ta bawal an walk-in mantang pinakusog man an information education campaign nganing masimbagan an mga kahaputan.
Dugang pa ni Villanueva na mismong an saiyang 95-anyos na ina an nagkusa namang magpabakuna bilang dakulang proteksyon kontra sa helang.
Sa ngunyan, labi sa 1, 300 naman an nabakunahan sa banwaan kun sain nasa 60 pa sana an nakakumpleto na kan first asin second dose.
