LEGAZPI CITY- Dakol na mga eskwelahan na sa National Capital Region an nagbabalo na mag-recruit sa Sorsoganon athlete na si Rose Jane Barcelona.
Si Barcelona an nakasungkit na nin tulong bulawan na medalya sa nagpapadagos na Palarong Pambansa 2024.
Nangibabaw kaya an record breaking performance kaini sa long jump, asin nakasungkit pa nin bulawan sa triple jump asin 100 meter dash track and field elementary.
Segun sa coach kaini na si Melvin Balaoro sa intrevista kan Bombo Radyo Legazpi na pigkakaolay siya kan mga coaches hali sa manlain lain na mga eskwelahan ngani na mag-ofresir sa pag-aadal ni RJ.
Marurumduman na sa presente Grade 6 na si RJ asin nakatalaan na maglaog sa Junior High School sa masunod na school year.
Segun ki Balaoro na dae siya nagtugot huli ta kaipuhan pa provincia nin Sorsogon nin sarong matibay na atleta na magdadara nin honra sa rehiyong Bicol.
Dugang pa kaini na kun mawot kan nasabing mga eskwelahan, kinakaipuhan suboot na halaton kaini na umabot sa Senior High School si RJ saka magtangro nin iba pang mga oportunidad.
Mientras tanto, kumpiyansa man an nasabing coach na makakapag uli liwat an nasabing young athlete nin medalya sa masunod na Palarong Pambansa huli ta kayang kaya kaining makipagsabayan sa secondary level.
