LEGAZPI CITY- Ikinaogma kan mga transport group kan pigbubusol sa ngunyan kan gobyerno na paglunsar sa Pantawid Pasada Program (PPP) bilang tabang sa mga tsuper na apektado kan magkakasunod na pagmahal kan mga produktong petrolyo.
Sa irarom kan programa matao an gobyerno nin mga card na lalaganan nin nasa P5,000 hasta P20,000 na pondo na magagamit sa pagpapakarga nin gasolina.
Sa intrevista kan Bombo Radyo Legazpi kay Orlando Marquez an Presidente kan Liga ng Transportasyon at Operators sa Pilipinas (LTOP), dakulang bagay na an lakdang na makakabawas sa gastuson kan mga tsuper lalo pa ngunyan na panahon nin pandemya.
Base suboot sa pakikipag-ulay kan mga transport group sa Department of Transportation (DOTr), pinag-aadalan man an posibleng pagatatao nin P5 na discount sa kada litro kan gasolina asin dagdag pang P1 na bawas para sa mga taga National Capital Region, Region 3 asin 4.
Alagad sa ibong kaini, dae man giraray pig-aatras kan LTOP an isinumitir na kahagadan para sa P3 na umento sa pamasahe sa opisina kan Land Transportation Franchising and Regulatory Board, huli ta hahalaton suboot muna na madagos an lakdang nganing makasiguro man an mga tsuper.
Naglalaom an transport na maootob asin maitatao sa lalong marikas na panahon an mga nasabing promesa nin tabang kan gobyerno, huli ta dakol na suboot na mga tsuper an nag-aagrangay sa labing iminahal kan mga produktong petrolyo.
Naenot ng inihayag ni Senadora Imee Marcos na mapaluwas na an Development Budget Coordination Committee (DBCC) nin nasa P1 bilyon para sa pagtatao kan ayuda sa nasa 178,000 na mga Public Utility Vehicles (PUVs) drivers.
