LEGAZPI CITY — Pinuunan na kan Department of Labor and Employment (DOLE) an saindang mga nakalinyadang aktibidad asin programa antes pa man an Labor Day sa Mayo 1.
Sa intribista kan Bombo Radyo Legazpi ki DOLE Bicol Director Atty. Ma. Karina Trayvilla, inanunsyar kaini na makundusir sinda nin Trabaho Negosyo Kabuhayan (TNK) Caravan sa nasambitan na aldaw sa pakikipagkoordinar sa Department of Trade and Industry (DTI.)
Segun pa ki Trayvilla, bako sana sa Legazpi magkakaigwa kan nasambitan na caravan alagad siring man sa syudad kan Naga sa Mayo 2 asin 3.
Sabay man na isasagibo sa Labor Day an press conference kan ahensya para sa saindang anunsyo dapit sa nagin resulta kan mga wage hearing na isinagibo sa bilog na kabikolan.
Digdi suboot maaaraman an bagong wage rate sa rehiyon makalihis an mga rekomendasyon na saindang naguno gikan sa parehong mga empleyado asin manehamiento.
Mientrastanto, laoman man kan mga naghahanap nin trabaho na sa maabot na Lunes, magkakaigwa sinda nin oportunidad bako sana sa employment alagad siring man sa entrepreneurship sa paagi kan bagong “job cum business fair.”
Segun pa ki Trayvilla, ibabale man ngunyan na taon an konseptong “Go Negosyo” kun sain ipapahiling an mga livelihood asin negosyo na pig-aasisteran kan DOLE.
Sinabi kan opisyal na magkakaigwa an TNK caravans sa Legazpi asin Naga nin labi sa dos mil na job vacancies kun sain 30 local firms, 10 overseas asin 7 ahensya kan gobyerno an matao nin job openings para sa mga aplikante sa mga job fair.
