Legazpi City- Liwat na nagpagirumdom an Ban Toxic sa publiko manungod sa pagbakal nin mga produkto na komon na ginagamit sa kapaskun. Kaibanan sa mga pigbabantayan kan grupo an mga produkto arog kan mga dekorasyon, pangpatos sa regalo , mga kawatan, asin iba pang mga produkto.
Sa intrevista kan Bombo Radyo Legazpi kay Ban Toxic campaigner, Thony Dizon, haros sarong bulan antes an kapaskuhan pinag-unambitan kan grupo na maging Vegilante sa pagpili kan mga babakalon para sa sa kapaskuhan. Importante suboot na maging mapili sa pagbakal. Ilingon suboot an mga palaatandaan arog kan ICC stickers , labeling asin kadakol pang iba.
Dugang pa kan opsiyal na saro sa saindang pinagbabantayan an pagbebenta nin mga gift wrappers huli na man sa mga kemikal na napaparong sa mga pangpatos. Pinag-iinganyar man kan opisyal an mga parabakal na magbakal nin mga recyclable na mga pangpatos para maibitaran an paglangkaw nanaman kan mairerehistro garbage collection ngunyan na bulan kan Desyembre o sa selebrasyon kan kapaskuhan asin bagong taon.
Sa padagos na paglibot libot kan grupo, napag-araman na kadakol nang produkto an igwa nin presensya nin nakakalason na kemikal na posible man na makaraot sa salud kan mga kaakian.
