LEGZPI CITY – Pigkakabiliban sa ngunyan an sarong Bicolano na nagibong makua an top 6 sa kakatapos pa sanang Registered Electrical Engineer Licensure Examination.
Sa intrevista kan Bombo Radyo Legazpi kay Engr. Jaymel Hiloma, aminado ining dae makabilib na nagibong dae sana makapasa alagad makua pa an ika-anom na pwesto sa pinakahalangkaw na puntos sa exam sa ratings na 90.20%.
Segun kay Hiloma, talagang tinutokan niya an pag-aadal para sa eksaminasyon kung sain bako sanang saro alagad tolong review centers an saiyang nilaogan.
Ginibo suboot an lakdang na ini ngani na makakua nin dakol na review materials asin mapag-adalan an mas dakol na mga kahapotan na posibleng magluwas sa exam.
Segun kay Hioma, sulit man an saiyang mga pagpapagal, oras asi gastos huli sa nakuang magayon na resulta sa eksaminasyon.
Insperasyon ni Hiloma an saiyang mga magurang asin tugang na dae nin sawa sa pagsuporta para sa saiyang pag-aadal.
Plano ngunyan kan bagong engineer na magpatugdok nin sadiring review center ngani na matabangan an ibang mga estudyante na makapag-adal para sa eksaminasyon lalo pang napag-agihan naman ansiring na mga kadipisilan.
Mensahe man kaini sa mga nagpaplano man na magkua nin eksaminasyon na i-disiplina an sadiri, tutokan talaga an pag-aadal asin lingawan muna an mga distructions ngani na makapasa.
