LEGAZPI CITY-Pumabor si South Korean President Lee Jae Myung sa pagbabago kan sistema kan gobierno sa nacion ngani gibohong apat na taon an termino kan Presidente na igwang pagtugot para sa re-election, kasabay kan paglilipat kan nagkapirang kapangyarihan kaini pasiring sa parliamento.
Segun kay President Lee, nagtetenir an saiyang posisyon poon pa kan 2022 presidential campaign na kaipuhang amyendahan an konstitusyon kan South Korea na haros 40 taon nang dai nababago.
Sa saiyang propwesto, mawot niyang bawasan an pig-aapod na “imperial presidency” sa paagi kan paglilipat sa National Assembly kan nagkapirang kapangyarihan sa pagpili kan Prime Minister, mga appointment, asin sa Board of Audit and Inspection.
Ipighayag man kan sarong opisyal poon sa Blue House na handa man sanang pahaliputon kan Presidente an saiyang sadiring termino kun kinakaipuhan ngani maipaotob sana an reporma sa saligang batas batay sa kasunduan kan manlain-lain na partido sa parliamento.
Sa South Korea, limitado sana sa limang taong termino an panunungkulan kan Presidente asin warang direchos na magin kandidato liwat.
