LEGAZPI CITY- Nagpadara pa nin dugang na pwersa an Sorsogon Police Provincial Office sa probinsya kan Camarines Sur ngani magtabang sa mga operasyon na isinasagibo huli sa naging epekto kan nakalihis na bagyong “KRISTINE”.
Sa intrevista kan Bombo Radyo Legazpi ki Sorsogon PPO spokesperson PMaj. Arwin Destacamento, napag-araman na sarong team an ipinadara sa nasabing provincia kun sain kaibanan an mga personahe na eksperto sa search and retrieval operations.
Naka-deploy an mga ini sa banwaan kan Milaor na pinaka naapektaran kan mga pagbaha siring man sa iba pang mga apektadong lugar.
Kasabay man sa deployment an mga ekipahe na gagamiton sa search and rescue and retrieval operation sa mga missing person sa probinsya.
Duwang rubber boat an dara kan mga otoridad kaibanan pa an truck kan provincia kan Sorsogon ngani na magtabang sa pag-transport sa mga apektadong residente.
