LEGAZPI CITY-Nagsagibo nin “no to impeachment motorcade” an mga miembros kan Solid Duterte Supporters Group (SDSG), bilang suporta ki Bise Presidente Sara Duterte asin bilang pagkontra sa nagpapadagos na impeachment proceedings.
Segun kay Solid Duterte Supporters Group National Parallel Officer Basher Cabrera, sa intrevista kan Bombo Radyo Legazpi na pirming nasa likod sinda kan Bise Presidente asin bako magayon an kaluluwasan kaini sa nacion sa tahaw kan kadakol na pigkakahampang na problema na dapat na pig-eenot kan mga senador.
Sinabi pa niya na maski pro o anti-Duterte, dapat na inotan man liwat an problema kan nacion siring kan padagos na pagbagsak kan ekonomiya asin paglangkaw kan mga barakalon.
Pighayag man niya mantang nagtetenir sa Malaysia, na makaingit an progresibo asin kadakol na turista digdi kaysa sa Pilipinas na suboot “kolelat” asin kadakol na pigkakahampang na problema.
Huli digdi, nagsagibo an grupo nin motorcade sa Davao, Cotabato, asin Davao Oriental asin pangapudan an “no to impeachment”.
Pigpapahiling suboot ninda digdi an pag-tutol sa impeachment laban sa Bise huli ta pabalik balik na sana ini asin dapat na nakatuon ngonian sa mga poyekto asin ekonomiya sa haros apat na taon, na mismong pangapudan man kan mga karatig na nacion sa Southeast Asia.
Punto pa ni Cabrera na pig-rerespeto ninda an opinyon kan iba sa orolay mapadapit sa pondo o “misused confidential funds” ni VP Sara, na pag-divert suboot sa totoong problema kan nacion, arog kan flood control kun sain dakulang pondo an nagamit.
Sa presente, pinaglalaoman ninda sa senado na magin patas asin maghiling sa tama asin sala asin dai ini maghaluan nin politika.
