LEGAZPI CITY- Nakaresibe nin tigti-P3,000 an mga Mayon evacuees sa banwaan kan Sto. Domingo, Albay hali sa Philippine Red Cross sa pangengenot ni PRC chair asin Senator Richard Gordon.
Parte ini kan ‘Cash for Relief Distribution’ kan PRC na pinuunan sa Sto. Domingo Gymnasium hasta ngunyan na aldaw nin Sabado.
Labi man an kaugmahan kan mga residente na nakabali sa listahan kan mga natawan siring na sana ni Norma Rodriguez na gagamiton suboot an naresibeng ayuda bilang puhunan sa sadit kaining tindahan.
Segun man ki Municipal Disaster Risk Reduction and Management Office head Engr. Ed Balidoy, haros gabos na labi sa 2,000 apektadong pamilya an nakaresibe nin ayuda makalihis an ipigsagibong validation.
Mientrastanto, sa ekslusibong intrevista kan Bombo Radyo Legazpi kay Sen. Gordon, mas pinili suboot ninda na magtao nin cash ngani na matawan nin diretsos an mga evacuees na makapili kun sain gagamiton an kwarta.
Sa ibong na lado, pinuunan na man an pagpapa uli sa mga evacuees sa nasambitan na banwaan.
