LEGAZPI CITY-Nagsangat si Senador Ronald “Bato” Dela Rosa nin duwang propwestong ley sa tahaw kan padagos niyang pagliban sa Senado.
Basado sa rekord kan Senado, kaiba sa propwestong ley na pinirmahan ni Dela Rosa, iyo an Proposed Senate Bill (SB) No. 2080 o an Counter Foreign Interference Act na nagpapadusa sa pangingiaram kan dayuhan sa nacion, na isinangat kan Lunes kasabay kan pagbabalik-sesyon kan kapulungan matapos an sarong bulan na recess.
Isinangat man an Senate Bill No. 2079 o an National Police Clearance System Act, na obhetong pakusugon an operasyonalisasyon kan sistema kaiba an pagpapatenir kan centralized record kan gabos na nairehistrong crime incidents, warrants of arrest, mga ladawan asin personalized details kan mga inaresto asin wanted persons.
Marurumduman na poon kan Nobiyembre 2025 pa dai nagpapahiling sa publiko si Sen. Dela Rosa asin dai na nagaatendir sa anumang sesyon sa Senado sa tahaw kan orolay na nag-isyu an International Criminal Court (ICC) nin arrest warrant laban sa saiya katakod sa kontrobersiyal na war on drugs.
Presente man na nahahampang an Senador sa ethics complaint huli sa haloy nang pagliban sa Senado.
Pinagkokomento man siya kan Senate ethics committee sa propwestong amyendahan an rules kaiba an “no work, no pay” policy para sa mga absent na senador.
