LEGAZPI CITY—Dakulang tabang para sa mga residentes kan Barangay Homapon Legazpi City an pigsagibong satellite registration kan Commission on Elections para sa mga mawot na magboto sa napaparaning Barangay and Sangguniang Kabataan Elections (BSKE).
Isinagibo an nasabing satellite registration ngunyan na Huwebes, Enero 29, sa nasabing barangay puon alas-8 nin aga hasta alas-tres nin hapon kun saen na ini nag-cut off.
Segun ki Punong Barangay Fidel Botin kan nasabing barangay sa intrevista kan Bombo Radyo Legazpi, maabot sa 100 indibidwal an nagparehistro gikan sa saindang barangay.
Pighayag kan kapitan na huli sa nasabing lakdang an nakatipid an mga konstituentes sa saindang pamasahe asin dae na mismo mapasiring pa sa ciudad kan Legazpi.
Mensahe man kan opisyal sa mga dae nakapagrehistro sa saindang barangay na pwedesir sindang magparehistro sa sunod na satellite registration na gigibohon sa Barangay Mariawa kan nasabing ciudad, saagang Biyernes, Enero 30.
Mientrastanto, nagpasalamat man si Botin sa mga opisyales kan barangay na nagtabang nganing magin matrayumpo an pagkundusir kan naunambitang registration magin sa esfuerso kan Department of Interior and Local Government.
