LEGAZPI CITY – Nadukayang wara nang buhay asin nagpapalataw-pataw an hawak kan sarong lalaki makalihis na malamos sa Barangay Jonop, Malinao, Albay.
Segun ki Malinao Municipal Police Station Chief of Police, Police Major Jayson Rey Florin sa intrevista kan Bombo Radyo Legazpi na nakipag-koordinar an opisyal kan nasabing barangay mapadapit sa lalaking nagpapalataw pataw sa kadagatan na nasa pangangataman kan Philippine Coast Guard.
Susog man sa saindang isinagibong imbestigasyon, binisto an biktimang si alyas “Islaw”, 72-anyos asin residente kan naunambitang barangay asin pangunguwa nin kahoy asin panggatong an hanapbuhay.
Napag-araman na dinara kan makusog na agos kan salog an nasabing biktima pasiring sa dagat makalihis ining magbalyo nganing magkuwa nin panggatong na nagresulta kan saiyang pagkalamos.
Pigtaram pa kaini na pinirit kan biktima na balyuhon an nasabing salog maski makusog an agos huli sa mga namateang pag-uuran nganing makakuwa nin kahoy na pigpapabakal man kaini nganing may makaon sa urualdaw.
Nahiling na sana an wara nang buhay na biktima kinaagahan kan sarong lokal na parasisira na nagpapalataw-pataw sa dagat.
Huli sa nasabing insidente an nagkondusir sinda nin pag-oolay kairiba an mga barangay officials asin manlain-laing ahensya kan lokal na gobierno nganing dae na madugangan pa an mga nalalamos sa banwaan.
Pagirumdom ni Florin sa mga makarigus sa mga salog asin dagat na sakop kan Malinao na bantayan an mga aki na kaiba, mga dae tatao maglangoy, asin magsunod sa mga regulasyon nganing malikayan an kapahamakan.
