LEGAZPI CITY-Ipighayag kan sarong Propesor na dapat an nangyayaring gender sensitivity issue kan nagkapirang opisyal kan gobierno, sarong pagirumdom sa publiko na pilion an karakter kan ibobotong opisyal sa maabot na eleksyon.
Segun kay Kontra Daya Convenor Professor Danilo Arao, sa intrevista kan Bombo Radyo Legazpi, na nagpapahiling sana ini nin pattern kan pag-iisip kan mga pampublikong opisyal kun papano ninda pig-trato an kababaihan.
Dagdag pa niya na nasa kultura na kan kongreso siring kan mga komento sa social media na kun papano pa kaya kun sinda-sinda sana an naghaharampangan.
Punto pa ni Arao na dai dapat pig-objectify an mga kababaihan huli ta posibleng iba an kahulugan kaini orog na igwang agwat sa edad na nagpapahiling kan pagigin “dirty old man” siring kan nangyari kay Representative Bong Suntay.
Sinabi pa kan opisyal na bako katanggap-tanggap an nagin pahayag ni Senator Jinggoy Estrada huli ta bako ini napapahon asin warang relasyon an citizenship sa personal relationship status asin sinundan pa kan pagdawit sarong married na senador.
Mensahe kan opisyal sa publiko na dapat sana ining tuyawon asin bako sana ini orolay mapadapit sa respeto sa kababaihan kundi bilang respeto sa kapwa tawo.
