Inihayag ni Vice President Sara Duterte na may sarong nacion na suboot an nagtugot na magtanggap sa saiyang ama na si dating Presidente Rodrigo Duterte, na presenteng nakakarsel sa The Hague, Netherlands mantang piglilitis sa International Criminal Court (ICC) huli sa mga kasong may kinaaraman sa crimes against humanity katakod kan saiyang madugong kampanya laban sa ilegal na droga.
Sa saiyang speech sa hampang kan mga Pilipino sa Japan kan Sabado, Setyembre 20, sinabi ni VP Sara na siya mismo an nakipagnegosasyon sa mga nacion nganing makahanap nin mapagkakatiwalaang nacion na matanggap sa saiyang ama huli ta segun saiya wara siyang maaasahan sa Pilipinas.
Dae man pinangaranan kan bise presidente an nasabing nacion, alagad sienerto niya na bako ini Japan.
An pahayag an kasunod kan kahagadan kan lado ni dating Presidente Rodrigo Duterte para sa interim release, na isinunad kan Hunyo.
Pagdoon kan saiyang abogado, wara suboot na flight risk si Duterte asin dae suboot kinakaipuhang magtenir na nakakarsel mantang nililitis.
Siring man nagkontra an Office of the Prosecutor kan ICC asin ipigdoon na kinakaipuhan an padagos na pagkakarsel ni Duterte nganing masierto an saiyang pag-atendir sa paglilitis, asin maibitaran an posibleng panghihimasok sa kaso o sa mga testigo.
Katakod kaini duwang organisasyon sa Pilipinas na nagtatabang sa mga pamilya kan mga biktima kan war on drugs an nagpahayag man nin pagkontra sa paramientras na paglaya ni Duterte, huli suboot sa peligro na maimpluwensyahan kaini an mga imbestigasyon asin kaligtasan kan mga testigo.
Magigiromdomang si dating Presidente Duterte ay ikinarsel sa Netherlands kan Marso 2025, asin nahahampang sa paglilitis katakod sa panggagadan sa panahon kan war on drugs, na segun sa kapulisan nag-abot sa 6,000, alagad segun sa mga human rights group aan posibleng nag-abot sa 30,000 kaiba na an vigilante killings.
 for charges involving crimes against humanity related to his bloody campaign against illegal drugs.){kind=link}