LEGAZPI CITY – Sarong kotse an buminaligtad sa tinampo na sakop kan Sto. Domingo, Albay nin huli sa warang patod na pag-uuran sa provincia.
Segun ki PCMS Nolan Balanta, an investigator kan Sto. Domingo Municipal Police Station sa intrevista kan Bombo Radyo Legazpi na hale sa Bacacay pasiring sa Legazpi City an nasabing behikulo mantang nagbabagsak an makusog na pag-uuran, nag zero visibility suboot su agihan asin dae namalayan kan driver na may concrete barrier sa saiyang pig-aagihan na tulos man nabangga na nagin kawsa kan pagbaligtad.
Pigkokonsiderar na accident prone area an pinangyarihan kan aksidente nin huli ta kalimitang dae namamalayan kan mga driver na biglang nagkikipot an agihan lalo na kun banggi asin madiklom sa lugar.
Wara man suboot na nadamay na sibilyan sa pinangyarihan kan insidente nin huli ta nangyari an pagbaligtad pasado alas tres nin maagahon kasuhapon.
Piglinaw man ni Balanta na nin huli sa raot kan panahon an nagin kawsa kan aksidente asin bako su mga naglalakop sa social media na huli sa pagkasilaw kan driver kan behikulo sa ilaw kan kasabatan kaining motorsiklo.
Sa presente, tulos man na nakaluwas sa hospital asin nasa maray nang kamugtakan an driver nin huli ta nagsapo sana ini nin mga menor na lugad asin kulog sa lawas na kawsa kan pagbaligtad kan kotse.
Pangapodan kaini sa mga motorista na mag-ingat sa pagbyahe asin magbigayan sa mga pampublikong tinampo nganing maibitaran an mga siring kaining insidente.
