LEGAZPI CITY—Sarong insidente nin kasulo an nairehistro sa Barangay Marifosque, Pilar, Sorsogon.
Segun ki Chief Investigation and Intelligence Unit, Bureau of Fire Protection Pilar, Senior Fire Officer 1 Sherwin Suarez, sa intrevista kan Bombo Radyo Legazpi, na an harong may duwang palagpag na kun saen gibo sa light materials an ikaduwang palagpag kaini.
Tulos man na nirespondehan kan saindang ahensya an insidente asin naibitaran an paglakop kan kalayo.
Sa ngunyan pig-aaram pa an nagin kawsa kan kasulo kun saen saro man sa mga pighihiling na anggulo iyo an sarong gasul na nagkaigwa suboot nin leakage.
Pigkakarkulo na maabot sa P8,000 an danyos sa nasambit na kasulo.
Dugang pa digdi na wara man na nairehistrong irido sa insidente.
Mientrastanto, nagpagiromdom an opisyal sa publiko na pirmeng paghilingon an mga materyales asin ekipahe sa harong na posibleng magkawsa nin kasulo para maibitiran an mga siring na insidente.
