LEGAZPI CITY — Liwat na nagkabakbakan an pwersa kan militar asin kan mga pigtutubudang miyembro kan rebeldeng grupong New People’s Army (NPA) sa parte kan Brgy Talisay, banwaan kan Oas, Albay.
Sa ipinaabot na impormasyon kan Oas Municipal Police, nagsasagibo nin strike operation an grupo kan Bravo Company kan 83rd Infantry Batallion asin sarong team hale sa 97th Military Intelligence Company na pinangengenotan ni First Lt. Catuday kan maksabat kaini an limang armadong kalalakihan.
Nagkapalitan nin putok an duwang lado na nagdurar nin 10 minuto asin nagresulta sa pagkagadan kan saro sa mga ini na binistong si Deomidis Apiniado alyas Delio mantang wara mang nairehistrong casualty sa hanay kan mga suldado.
Narekober hale sa nasabing insidente an sarong hand grenade, sarong kalibre 45 na badil asin limang bala siring man an nagkapirang mga subersibong dokumento.
Sa ngunyan, nagpapadagos pa an pursuit operation kan mga suldados laban sa mga kaiba kaini na nagdulag pasiring sa kabulbudan.
