Nagsunad nin “not guilty” plea si Sarah Discaya kaiba an siyam pang akusado katakod kan suboot ghost flood control project na nagkakantidad nin Php 96.5 million sa Davao Region.
Ginibo ninda ini sa isinagibong arraignment para sa duwang kaso nin pagbalgar sa Anti-Graft and Corrupt Practices Act asin malversation of public funds sa RTC branch 27 sa Lapu-Lapu City.
Kabale ni Discaya na nagsunad man nin “not guilty” sinda Ma. Roma Angelin Rimando, representante kan St. Timothy Construction, asin walong indibidwal gikan sa DPWH Davao Region.
Sinda an nahahampang sa mga alegasyon nin pagbalgar sa ley huli kan saindang papel sa nasabing proyekto.
An sampulong akusado dinara hale sa Lapu-Lapu City Jail pasiring sa courtroom ni Judge Nelson Leyco para sa pormal na arraignment.
Durante kan hearing, sinayumahan kan korte an kahagadan kan mga akusado na ibasura an mga kaso kontra sa sainda asin ibalik sa kustodiya kan National Bureau of Investigation (NBI).
Dae man pinagbigyan kan korte an saindang mosyon na ibasura an kaso.
An pre-trial conference nakaiskedyul sa Pebrero 3, 2026, kun saen an mga isyu asin ebidensya pag-uulayan antes an pormal na paglilitis.
