Kinumpirmar kan Bureau of Immigration na na-deport na pabalik nin Russia an Russian vlogger na si Vitaly Zdorovetskiy.
Segun sa BI, si Zdorovetskiy naglunad sa IrAero flight pasiring sa Irkutsk kan Sabado.
Pigsugo kan BI Board of Commissioners an saiyang deportasyon kan Disyembre 17 makalihis na ideklarar siyang undesirable alien.
Nag-ugat an deportation order sa manlaen-laen na reklamo na isinangat laban sa 33-anyos na vlogger katakod kan saiyang harassment asin kawaran respeto sa nagkapirang mga Pinoy.
Si Zdorovetskiy enot na inarestar kan Abril kan nakaaging taon.
Nabisto siya sa pagpost nin mga prank video sa social media, kabali na an panggugulo sa security guard, pagmuda sa Filipinang na nakasulot nin face mask, paghabon nin industrial electric fan, asin paglunad nin traysikel na dae naghaloy an nakabangga sa sarong nakaparadang jeepney.
Durante kan inquest proceedings, inako kaini an mga salang gawi kaya nakulong sa BI Warden’s Facility sa Camp Bagong Diwa sa Taguig.
Kun saen nagporbar siyang magpiyansa alagad dae tinugutan kan Bureau of Immigration.
Makalihis an deportasyon, pigbale man kan Bureau of Immigration an pangaran ni Zdorovetskiy sa blacklist.
