LEGAZPI CITY-Piglalaoman na mahampang mismo bilang testigo si Leyte Representative Martin Romualdez para sa sadiring depensa sa P7.44-billion na plunder case na isinangat laban saiya.
Segun sa saiyang abogado na si Atty. Ade Fajardo, mawot ni Romualdez na magkaigwa nin oportunidad na magdepensa sa korte makalihis na pormal na tapuson kan Sandiganbayan Third Division an pre-trial proceedings.
Pwedisir man na ipresentar kan depensa an mga security aides asin an driver kan saiyang kaibahan na akusado—si dating Ako Bicol Representative Zaldy Co—kabali na si Orly Guteza na suboot binawi an saindang naenot na pahayag.
Sinabi ni Fajardo na sa saiyang bagong sinumpaan na affidavit, sinabi ni Guteza na an saiyang nakaaging testimonya parte kan sarong set-up.
Igwa nin mga 40 na potensyal na testigo sa depensa, maski ngani an numero na ini pwedisir pang magbago depende sa ebidensya na iprinesentar kan prosekusyon.
Si Romualdez padagos na nakakulong sa Quezon City Jail–Male Dormitory sa Payatas, mantang an tulo sa saiyang mga kaibahan na akusado, kabale si Co, nagtetenir na “at large”.
Mientras tanto, an Sandiganbayan nagpagirumdom sa abogado ni Romualdez na si Judd Roy, pakatapos na kwestyunon kaini an pagbasa kan impormasyon durante kan arraignment sa mga pahayag na ginibo sa media.
Pinagirumdom ini kan korte, na ini sarong standard na parte kan proseso na may katuyuhan na suportaran an derichos kan akusado na maimpormaran an mga akusasyon laban saiya.
Sinabi ni Fajardo na pigrerespeto kan depensa an paninindugan kan korte asin dapat na mantiniron kan mga abogado an respetadong gawi bilang mga opisyales kan korte.
