Nangapudan si dating Anakalusugan Rep. Mike Defensor na ibugtak sa protective custody si Orly Guteza asin an 18 katawo na nagsasabing dating Marines, na suboot nagsirbing bagmen kan dating Ako Bicol Rep. Zaldy Co, tanganing masiguro an saindang kaligtasan asin testimonya.
Sa sarong press conference, ipinahiling ni Defensor ang kopya kan sarong 61-pahinang complaint affidavit na isusunad kan Office of the Ombudsman laban kina Co asin dating House Speaker Martin Romualdez katakod kan suboot katiwalian sa flood control projects.
Segun ki Defensor, kabale sa dokumento ang mga testimonya ninda Guteza asin anom sa 18 na “ex-Marines.” Mantang wara pang pormal na kaso laban kay Romualdez, isinabay suboot an mga sinumpaang salaysay sa ex parte application kan Ombudsman para sa precautionary hold departure order laban saiya.
Inomaw man ni Defensor ang Ombudsman, partikular si Ombudsman Boying Remulla, sa suboot pagpapadagos kan imbestigasyon sa kaso.
Ipigheras man ni Defensor ang sarong audio kan suboot pag-oolay ninda Guteza asin kan saiyang agom kan nakalihis na taon, kun sain sinasabi suboot pigpipirit ni Guteza na idoon sinda Defensor asin Sen. Rodante Marcoleta sa suboot pigbabayadan siya karibar kan saiyang testimonya.
Magigiromdomang nawara si Guteza matapos siyang tumestigo sa Senado kan Setyembre, kun sain sinabi niyang naghatod siya nin suboot kickbacks sa mga pagrugarin na ipigdadawit ki Co asin Romualdez.
