LEGAZPI CITY – Kritikal an kamugtakan ngonian kan duwang indibidwal makalihis buminangga an pigsasakayan nindang motorsiklo sa sarong truck na naka-garahe sa kahalabaan kan Barangay Buraburan, Juban, Sorsogon.
Segun ki Juban Municipal Disaster Risk Reduction and Management Office Head Arvee Madronio sa intrevista kan Bombo Radyo Legazpi na tulos nindang nirespondehan an naunambitang aksidente kabale an mga personahes kan Sorsogon Provincial MDRRMO asin Irosin Emergency Response Team nganing matawan nin atensyon medikal an mga nairidong persona.
Dae man ninda masabi kun ano an tunay na rason kun ngata nakabangga an motorsiklo sa nakaparadang truck sa ibong kan dae man nin impluwensya nin arak an rider asin an saiyang backride.
Basado man sa pagresponde kan mga Emergency Response Teams an napag-araman na kan magresponde sinda sa pinangyarihan kan insidente an may mga lugad sa hawak an mga biktima asin dae na naghahangos an saro.
Pigtaram pa kan opisyal na pigkokonsiderar an naunambitang barangay komo accident prone area huli ta 19 nang vehicular accident an nairehistro sa parehong lugar poon kan nakaaging bulan nin Enero.
Pagirumdom niya man sa mga residentes na enkaso may nangyaring aksidente sa saindang lugar an makipagkoordinar tulos sa saindang mga ofisina asin iba pang ahensya nganing tulos ini matawan nin magkakanigong aksyon.
Pagdoon niya man sa mga kapareho suboot na mga insidente an mas maray na enuton muna mag-apod sa saindang hotline numbers kaysa sa magvideo kan pangyayari.
Pagirumdom ni Madronio sa mga motorista na dae na magpirit magmaneho enkaso nakainom nin arak, ipa-check an behikulo, magsulot nin protective gears asin helmet, asin dae paglingawan na magsunod sa ley trapiko.
