LEGAZPI CITY—Sarong resolusyon an ipigsunad sa Sangguniang Panlalawigan ng Catanduanes mapadapit sa pangapudan sa Philippine Fiber Industry Development Authority (PhilFIDA) na magtaong aksyon sa nagdadakol na kaso kan pagkalat nin helang na nakakaapektar sa mga plantasyon nin abaca sa provincia.
Segun ki Philippine Fiber Industry Development Authority Catanduanes Provincial Fiber Officer Bert Lusuegro, sa intrevista kan Bombo Radyo Legazpi, saindang ipigpasalamat an nasabing resolusyon na isinumiter ni Provincial Board Member Tito Villamor huli sa saiyang pagmakulog sa industriya kan abaca, alagad, para saiya na baka kaipuhan na sanang i-update an opisyal sa mga programa kan saindang opisina partikularmente na sa abaca daily management.
Segun ki Lusuegro na kada taon an igwa man sindang programa mapadapit sa disease eradication kun saen sagkod sa ngunyan an padagos man ninda ining pigkukundusir sa banwaan kan Viga.
Dugang niya na nakatalaan man na gigibohon ini sa banwaan kan Caramoran sa masunod na taon.
Sa presente, nasa 80% o haros patapos na an saindang abaca disease management program ngunyan na taon.
Tinawan-duon pa kan opisyal na dae ipag-asa sa PhilFIDA huli ta limitado an pigtataong pondo sainda asin kinakaipuhan na magtarabangan kan gobierno asin ibang ahensya mapadapit sa pagresolbar kan pagkalat nin helang na nakakaapektar sa mga industriya kan abaca sa nasambitang lugar.
