LEGAZPI CITY – Pina-uranan nin bala kan dae pa midbid na mga suspetsado an harong kan sarong Barangay Captain kan Brgy. San Vicente Grande, Daraga, Albay.
Pag-istorya ni kapitan Armando Lomerio sa intrevista kan Bombo Radyo Legazpi na nangyari sa kasagsagan kan saindang pagturog bandang alas tres nin maagahon asin pighuna pa ninda na simpleng lagabog sana sa saindang palibot.
Kan kinaagahan suboot an nadiskubre ninda na an saindang harong na palan pinagbabadil huli ta nahiling ninda na may luho an saindang bubong asin may tama nin bala an saindang lanob.
May nakahiling man suboot na duwang persona an nakasakay sa motor an may kagibo an pagpapa-uran nin bala sa saindang kaharongan.
Pigtaram pa kan nasabing kapitan na nagkawsa man an nasabing insidente nin takot sa saindang pamilya alagad kaipuhan na sana suboot na kusugan an saindang boot.
Dae niya man pighahale an posibilidad na may kinaaraman sa eleksyon an nagin motibo kan pambabadil sa saindang residencia asin siya an pigpontirya kan mga ini.
Kun siya an hahaputon wara man suboot siyang nagin kaiwal sa saindang barangay asin sa pulitika.
Pagdoon ni Lomerio na pwedesir man siya na ka-olayon sa personal kan mga may kagibo kan pambabadil urog na kun may dagit suboot huli ta bako man siya difisil kaurunon.
