LEGAZPI CITY – Kasabay kan paglaog kan bulan kan Marso, iseselebrar man kan Bureau of Fire Protection (BFP) an ika 51 taon kan Fire Prevention Month sa enterong Pilipinas.
Bilang pagsunod sa nasambitan na kasuguan, ilulunsar an fire prevention month sa rehiyon sa maabot na Marso 7 kun saen parte kan kick-off an pagkondusir nin parada asin awarness campaign kasabay an mga lokal na ehekutibo, Department of Education, non-government organizations, asin volunteer fire brigade na mangyayari sa Bicol University grounds.
Sa intrevista kan Bombo Radyo Legazpi ki Bicol Regional Director Fire Chief Supt. Igmedio Bondoc Jr, sinabi kaini na antes matapos an Pebrero mas maray na maipaabot sa publiko an mga programang nakapalaog bako sana para sa bulan kan Marso kundi sa bilog na taon.
Kasabay na digdi an padagos na pagsagibo nin Barangay Ugnayan para sa mga seminar na tutukaron an mga dapat na gibuhon kan lambang residentes en kaso magkaigwa nin kasulo asin an mga dapat na gibuhon ngane na maibitaran an nasambitan na insidente.
Segun pa sa opisyal, ginibong Marso an fire prevention month huli sa labing init tuyong bulan na ini alagad sa ngunyan, huli naman suboot sa namamateang climate change, mas maray na ikonsiderar na fire prevention month an enterong bulan kan taon.
Mientrastanto, segun ki Bondoc, nag-oorganisa man sinda nin volunteer fire brigade huli sa nagtutubod sinda na ini an magigin katabang ninda sa pag-apula nin kasulo.
An mga ini kaya suboot an maserbing first line of defense antes pa man mag-abot an lehitimong mga bumbero asin an mga volunteers an makondusir nin primer na lakdang ngane na dae na mapalakop asin magdakula pa an kasulo.
