LEGAZPI CITY—Naka-red alert status na an regional emergency operation center kan Bicol katakod sa pagpreparar sa bagyong Opong.
Segun ki Office of Civil Defense Bicol Spokesperson Gremil Naz, sa intrevista kan Bombo Radyo Legazpi, naka-standby na man an saindang personahes en kaso may kinakaipuhang augmentation sa mga local government units sa rehiyon.
Sa red alert status, an saindang response agencies an abelable sa oras na kaipuhan magpa-apod nin emergency meetings asin sinda an mangengenot sa kaniya-kaniyang clusters na kapot ninda nganing tulos na matawan nin resources na pangangaipuhan an mga LGU.
Siring man an pagkundusir kan saindang opisina nin daily weather update asin daily situation briefing kaiba an response agencies.
Sainda na man suboot pigpaaraman an mga Provincial Disaster Risk Reduction and Management Office na i-asigurar na 24/7 an emergency operation centers sa Bicol, asin pagsagibo nin pre-disaster risk analysis meeting nganing maaraman kun anong mga barangay asin households an dapat na i-ebakwar urog na an mga nasa high-risk areas.
Abiso man kan opisyal sa publiko na makipagkoordinar sa mga local disaster risk reduction and management centers nganing marikas na matawan sinda nin tabang.
Siring man na en kaso man pigpapaotob an pag-ebakwar tulos na magsunod sa mga otoridad nganing warang rescuer an magruso sa kasagsagan kan makusog na pag-uuran asin pagbaha asin nganing masierto na nasa ligtas na lugar oras na magrapado an bagyong Opongs sa rehiyon.
