LEGAZPI CITY — Nasangat na nin kasong pagbalgar sa Section 11 kan Article II sa Republic Act 9165 o “Comprehensive Dangerous Drugs Act of 2002” an ipigkokonsidirar na Rank Number 1 sa Provincial Drug Watchlisted Personalities kan Masbate.
Enot kaini, nadakop sa sarong matrayumpong anti-illegal drugs operation si Roque Sese alyas Oking makalihis na isirbe kan Masbate Provincial Police sa pakikipagtabangan sa Balud Municipal Police an search warrant sa harong kaini sa Brgy. Jintotolo, banwaan kan Balud.
Narekober man sa posisyon kan 58-anyos na parasisira an sarong carburetor repair kit kun sain nakabugtak an duwang dakulang pakete asin duwang sadit na plastik nin pigtutubudang shabu na may gabat na 25.293 grams.
Sigon ki forensic chemist na si PC/Insp. Wilfredo Pabustan Jr., aabuton nin poco mas o menos P100, 000 an kantidad kan nasambitan na iligal na droga.
Nagtutubod man an opisyal na makusog na ebidensya an mga nakumpiskar na bagay sa pagpapadagos kan kaso kontra ki Sese.
