LEGAZPI CITY-Naarestar an sarong top 3 most wanted person huli sa kasong child abuse sa Matnog Sorsogon.
Segun kay Sorsogon Police Provincial Office Spokesperson, Police Major Arwin Destacamento, sa intrevista kan Bombo Radyo Legazpi, na binisto an suspek na si alyas “Domeng”, saring 29-anyos asin residente kan nasambitang lugar.
Naarestar an suspek sa isinagibong koordinasyon kan Matnog Municipal Police Station asin 502nd Manuever Company asin iba pang puwersa kan kapulisan.
Nahahampang an suspek sa kasong nagbabayolar sa Republic Act 7610 o an Special Protection of Children Against Child Abuse, Exploitation and Discrimination Act.
Basado sa impormasyon kan otoridad, warang relasyon sa suspek an biktima asin dai na ipigtao an detalyes manungod sa lugar kaini huli sa menor de edad an biktima.
Pigrerekomenda man an piyansa na nasa kantidad P180, 000 para sa pansamantala kaining kalayaan.
Sa presente, nasa kostudiya na kan Matnog MPS an suspek para sa karampatang disposisyon.
Abiso man sa publiko an kinakaipuhan an pag-alaga kan mga magurang sa saindang mga aki, ngani dai na mangyari an siring kaining pang-aabuso asin enkaso igwang kaparehong insidente an tulos na ipaaram sa mga otoridad ngani matawanan nin aksyon.
