LEGAZPI CITY—Karsel an bagsak kan sarong indibidwal na binisto bilang Rank 5 Regional Most Wanted Person kan Bicol sa ginibong operasyon kan mga otoridad sa Ligao City.
An akusado sarong 69-anyos, may agom asin residente kan banwaan nin Polangui, Albay.
Naarestar ini sa bisa kan warrant of arrest para sa kasong six counts nin qualified rape of a minor, na warang pigrerekomendang piyansa.
Naarestar an akusado sa pinagsarong pwersa kan Polangui Municipal Police Station, Police Intelligence Unit, Regional Intelligence Unit 5- Provincial Intelligence Team Albay, Albay 1st Provincial Mobile Force Company, asin Provincial Highway Patrol Team Albay.
Sa presente nasa kustodiya na an akusado kan Polangui MPS para sa magkakanigong disposisyon.
