LEGAZPI CITY — Karsel an bagsak kan sarong karpentero makalihis na maarestar kan mga otoridad sa Barangay Central, Bulusan, Sorsogon huli sa kaso kaining frustrated murder.
Nabisto an suspetsado na si Ramon Mapa, 51-anyos asin residente kan Barangay San Pedro, Irosin, sa nasambitan na probinsya.
Sa impormasyon na naguno kan Bombo Radyo Legazpi, napag-araman na ikinasa an operasyon kan pinagsarong pwersa kan Intel operatives asin mga personahes kan Bulusan Municipal Police kontra sa suspek na nagresulta sa pagkaka arestar kaini.
Napag-araman na si Mapa man an pigkokunsiderar na rank 10 municipal most wanted person sa Irosin.
An saiyang kaso an igwang rekomendadong piyansa na nagkakantidad na P50,000 para sa paramientras na libertad.
Sa presente nasa konstodiya na ini kan Irosin PNP para sa magkakanigong disposisyon.
