Patung-patong na kaso an isinangat kan Quezon City Police District kontra sa trasport group na Manibela huli sa pagsasagibo nin hiro protesta asin strike puon Hunyo 10 hasta 12.
Segun sa Quezon City Police District, ipigrereklamo sinda Manibela chairperson Mar Valbuena asin Manibela Bulacan/San Fernando, Pampanga president Regie Manlapig nin pagbayolar sa Public Assembly Act of 1985, alarms and scandals asin resistance and disobedience to a person in authority.
Huli ini sa pagsasagibo nin protesta kan grupo maski na wara nin permit hali sa lokal na gobyerno.
Nagkawsa nin matinding gubot sa trapiko an hiro protesta kan Manibela na binalo pa kutang pakihuronan kan mga pulis alagad dae man dinangog.
Sarong miyembro man kan media an nagsangat nin reklamong physical injury kontra sa grupo makalihis suboot ining kulogan kan mga drivers asin operators na kasabay sa hiro protesta.
Magigirumduman na ipigpoprotesta kan grupong Manibela an pagpapalawig nin sarong taon kan suspensyon sa Jeepney modernization program kan gobyerno.
