LEGAZPI CITY-Nangangapudan an sarong transport group na magkaigwa nin unified rollback sa presyo kan produktong petrolyo asin maibaba ini sa kantidad na P55 kada litro sa diesel asin P57 naman sa gasolina.
Segun ki Piston National President Mody Floranda, sa intrevista kan Bombo Radyo Legazpi na dakulang tabang an magigin rollback alagad kun ikukumparar ini, dakula man liwat an presyo kan Diesel na igwang kabilugang presyo na nag-aabot sa haros P115-155 kada litro.
Dagdag pa niya na bako ini an kabilugang tabang para sa sektor huli nagkakawat man liwat sa halangkaw na presyo an produktong petrolyo asin mas halangkaw man liwat an ikakarga kan mga behikulo.
Pangapudan pa niya na dapat bako na paluway-luway an pag-rollback sa presyo, kundi sarong rollback na sana ngani makatabang sa mga driver asin sa mga namamanwaan.
Sinabi man ni Floranda na enkaso magbaba na an presyo kan krudo, mababa man an presyo kan mga barakalon asin magkakaigwa nin bastanteng ganansya an mga obrero para sa saindang pamilya.
Suhetsyon niya man na mantang padagos an agresyon kan US asin an epekto kaini sa presyo kan langis, dapat na magkaigwa nin stock an Pilipinas ngani dai na maapektaran an suplay kan krudo sa nacion.
Mientras tanto, pig-eenganyar man kan grupo an publiko na makisumaro sa pagsasagibo nin mahiwasang protesta na pig-aapod na “Protestang Bayan” bago matapos an bulan kan Abril, kun sain ipapangapudan an padagos na paglangkaw kan presyo kan produktong petrolyo asin an agresyon kan Estados Unidos.
