LEGAZPI CITY — Pighahalat pa sa presente kan Albay Public Safety and Emergency Management Office (APSEMO) an resulta kan isinasagibong ground survey asin mapping kan Philippine Institute of Volcanology and Seismology (PHIVOLCS) sa materials kan bulkang Mayon.
Ipighayag ni APSEMO chief Dr. Cedric Daep sa intrevista kan Bombo Radyo Legazpi na isasabay kaya ini sa planning katakod kan pigkakahaditang debris na maibaba durante kan makukusog na mga pag-uran sa hudyan na quarter kan taon na makakaapekto sa mga komunidad.
Afuera kaya sa lahar materials kan bulkan sa pag-aalburoto ngonian na taon asin old deposits, hihilingon man an volume kan mga debris na hale sa quarry.
Katakod kaini, klinaripikar ni Daep na ipigbabawal talaga an pagka-quarry sa 6-kilometer Permanent Danger Zone (PDZ) urog na kun naglagpas na sa salog an aktibidad.
Segun ki Daep, posible kayang magin huma man an mga loose materials na hale sa quarry sa mga pagtaraid na komunidad sa mga pig-aantisiparang peligro.
Magigirumduman na sinuspinder ni Environment Secretary Roy Cimatu an quarry operations sa nagkapirang rehiyon sa Pilipinas sa paghadit na maarog sa nangyari sa Naga City, Cebu asin Itogon, Benguet an iba pang quarry sites.
