Pinahimutikan kan Department of Justice an ‘persekusyon’ o panggigipit suboot kay former presidential spokesperson Atty. Harry Roque makalihis iluwas an arrest warrant laban saiya.
Kun saen, pigtawan doon kan nasabing kagawaran na ‘prosecution’ asin bako ‘persecution’ an saindang pagtrato sa kaso kan dating tagapagtaram ni Former President Rodrigo Duterte.
Nagtutubod kaya an Department of Justice na warang basehan an patutsadang ini ni Atty. Harry Roque huli sa pinag-adalan man nin maray an pagluluwas nin warrent of arrest.
Segun mismo sa tagapagtaram kan kagawaran na si Justice Assistant Secretary Mico Clavano, igwang bastanteng ebidensiya an iprinisinta sa panel of prosecutors na siyang pinagbasehan nganing mauli sa pagsusunad sa korte an kasong pigkakahampang kan naunambitang abogado.
Kun kaya arug na sana kaini an pag-ngalas ni Justice Spokesperson Mico Clavano huli sa suboot lehitimo man asin may konkretong ebidensya an kina-iimbweltuhang kaso ni Atty. Harry Roque.
Pagdoon pa kaini na dae niya mahiling an arin man na anggulo nin panggigipit o persecution sa nasabing kaso na siya mang pigtutubudan kan ibong na lado.
Mientrastanto sa lado man ni Atty. Harry Roque, pigpipirit pa man kaini na an kasong pigkakahampang niya an maikokonsidere pa man na panggigipit laban saiya.
Suspetya kaya niya na ini an huli sa saiyang paninindugan o posisyon sa orolay pampolitikal.
Alagad sa ibong kaini, inihayag man kan Department of Justice na sinda an nakatalaan magsumiter nin surat sa gobyerno kan The Netherlands nganing ipaliwanag an kasong pigkakahampang ni Atty. Harry Roque kun saen siya an nagtetenir hasta ngonian.
Piglalaoman nindang dagos nang maibalik sa Pilipinas an nasabing abogado nganing digdi hampangon an mga kasong isinunad laban saiya.
