Posibleng maeksperyensyahan an dikit na paglangkaw kan presyo kan karneng orig mantang nagdadangadang an aldaw nin pasko, segun sa Department of Agriculture (DA).
Pigkakarkulo na an presyo pwedeng maglangkaw nin sagkod sa ₱1.25 kada kilo huli sa naglangkaw na demand ngonian na holiday season.
Segun sa DA, an maximum suggested retail price (MSRP) kan liempo nagtetenir sa ₱370 kada kilo, mantang an sa kasim asin pigue an nasa ₱330 kada kilo.
Pigpaliwanag kan ahensya na mas halangkaw an presyo kan liempo huli ta ini pigkokonsiderar na “choice cut” o preferred part kan orig, kun kaya natural na mas mahal ini kumpara sa ibang klase.
Base sa mga naobserbaran na trend sa mga nakaaging taon, kalimitan suboot an paghiro kan presyo kan karneng orig sa panahon nin Kapaskuhan.
Ini an huli sa paglangkaw kan demand, orog na sa panahon kan Noche Buena asin Christmas parties.
Alagad, sinabi kan DA na nagkaigwa nin pagbabago sa gawi kan mga konsumidores.
Susog sa ahensya, mas dakol na tawo an nagpipili ngonyan na magbakal nin lutong kakanon sa mga tindahan asin restaurant imbes na magluto sa harong, na pwedeng makatabang na dai maglangkaw an demand para sa sariwang karneng orig.
Pigsierto kan DA na padagos nindang babantayan an presyo kan karneng orig sa mga merkado asin makikipag-koordinar sa mga paratinda nganing masierto an pagsunod sa itinalaan na MSRP asin maibitaran an labing paglangkaw kan presyo sa tahaw kan holiday season.
.){kind=link}