LEGAZPI CITY — (Update) Sinierto kan Albay Public Safety and Emergency Management Office (APSEMO) na warang significant na pagbabago sa presyo kan mga babarakalon sa merkado sa ibong kan naeeksperyensyahan na kalamidad sa probinsya dara kan naga-alburutong bulkang Mayon.
Segun ki APSEMO chief Dr. Cedric Daep, ini an nagluwas sa ipigsagibong price monitoring kan Department of Trade and Industry (DTI) katakod kan pagpapaotob kan price freeze sa irarom kan deklarasyon kan state of calamity sa Albay.
Pigbabantayan man suboot magin an mga agriculture products sa tabang kan Department of Agriculture siring man an mga bulong sa paagi kan Bureau of Food and Drugs.
Mientras tanto, nagpatanid man an opisyal na posibleng sa korte maghirilingan enkaso igwang mga negosyante na mapapatunayan na pigsasamantala an sitwasyon ngani na palangkawon an presyo kan mga basic goods and commodities.
