LEGAZPI CITY – Nangapodan an presidente kan sarong transport group sa provincia kan Albay na dae pagpasakitan an mga driver asin operator kan mga traditional jeepneys.
Paliwanag ni Tom Magallanes sa intrevista kan Bombo Radyo Legazpi na makakatabang sa sainda kun tutugutan kan Gobierno an pag-renew kan mga traditional public utility vehicle (PUV) na pigkukuwaan kan saindang panggastos sa pang-urualdaw na pangangaipuhan.
Punto pa niya na pasakit para sa sarong ordinaryong driver asin operator an pigpapa-otob na Public Utility Vehicle Modernization Program huli ta dae ninda kayang bunuon an labing halangkaw na presyo kan mga bagong unit.
Pagdoon pa niya na dae pa suboot hinog an programa huli ta nagtetenir na halangkaw an presyo kan unit kun kaya dae ini pig-aaprobitsaran kan mga ordinaryong driver asin operator asin pigpipili na sanang pakarayon an saindang lumang unit.
Suhestyon man kaini na kun ibubusol kan gobierno an programa an tugutan man dapat sinda na i-rehab asin pagayunon an mga lumang unit nganing salbado ining mapakinabangan kan mga commuter.
Mawot niya man na pag-adalan muna kan mga mambabatas an naunambitang programa nganing dae ini magserbing pasakit sa mga driver asin operator.
Afuera pa kaini an kahagadan man ni Magallanes na dagos nang tanggalon kan Gobierno an buwis sa produktong petrolyo nganing magbaba an presyo kaini huli ta dapat sinda an nagpapa-otob kan mga presyo asin bako an mga oil companies.
