LEGAZPI CITY – Tutukaron sa isasagibong meeting sa aga, Enero 14, kan Commission on Higher Education (CHED) central asin regional offices kun tutugutan na an limited face-to-face classes sa tertiary level.
Ini an kinumpirmar sa Bombo Radyo Legazpi ni CHED Bicol Regional Director Freddie Bernal.
Sa nasabing meeting piglalaoman na mapag-oolayan an mga rekomendasyon sa manera asin kun sain na mga lugar sana ipapaotob an lakdang kun encaso.
Sa punto de vista ni Bernal, haros magkakapareho an sitwasyon sa manlain-lain na rehiyon sa nasyon asin may mga higher education institution na nasa island town na “zero COVID” kun sain posibleng tugutan an limited face-to-face.
Magigin padificilan kaya kun magsasagibo kaini mantang nagdadakol an kaso sa sarong lugar.
Alagad piglinaw ni Bernal na an pinal na desisyon an susog man guiraray sa orolay sa commission en banc asin da man iluluwas kun warang pag-uyon hali sa Malakanyang asin Inter-Agency Task Force on the Emerging Infectious Diseases.
Alas-2:00 nin hapon mapuon an nasabing meeting.
Sinabi pa ni Bernal na sa presenteng school year suway sa piglalaoman huli sa pandemic, mas dakol lugod an numero kan enrollees urog na dai nang “vacuum” makalihis na maka-graduate naman an mga hali sa Senior High School.
