LEGAZPI CITY—Huli sa nagpapadagos na krisis sa produktong petrolyo, nakatalaang ibarewas kan gobierno provincial kan Catanduanes an pondo sa selebrasyon kan Abaca Festival para sa mga apektadong sektor partikularmente sa abaca farmers, magin sa mga obrero na yaon sa turismo asin transportasyon.
Segun ki Catanduanes Governor Dr. Patrick Azanza, sa intrevista kan Bombo Radyo Legazpi, an pondo nindang P3.5 milyon para sa nasabing selebrasyon an itatagama ninda na ayuda o tabang para sa mga nasabing sektor.
Tinawan-doon niya na dae man sinuspinder an okasyon alagad gigibohon ini online kun sain gagamiton ninda an mga lumang video asin an ibang live coverages siring kan trade fair kan Department of Trade and Industry.
Dugang kan opisyal na nakikipagkoordinar na man sinda sa manlaen-laeng ahensya siring kan Department of Agriculture, Department of Social Welfare and Development, Department of Transportation para sa maitataong asistensya nganing maski papano an mabawasan an epekto kan presenteng krisis sa saindang namamanwaan.
Mientrastanto, pig-asigurar man kan gobernador na may piggigibo sindang mga lakdang nganing dae man labing maapektaran an namamanwaan.
