LEGAZPI CITY—Suminakat na sa 408 pamilya an nag-ebakwar sa banwaan kan Malilipot, Albay makalihis an pag-aalburoto kan bulkang Mayon.
Segun ki Malilipot Mayor Cenon Volante, sa sa intrevista kan Bombo Radyo Legazpi, kabale sa mga apektadong residentes an nag-eebakwar na sa tent city an gikan sa Barangay Calbayog asin Barangay San Roque.
Alagad sinabi man kan alkalde na may nagkapira pang residentes an nawalat sa mga classroom kan San Jose Elementary School asin San Jose National High School sa Barangay San Jose kan kaparehong banwaan.
Pighayag man kaini na presenteng kulang pa an mga gagamiton na tents asin posibleng magpadara pa suboot an Department of Social Welfare and Development.
Nagmamawot man an opisyal na magibohon nin paagi an mga nagtitinir sa laog kan 6 kilometer radius Permanent Danger Zone na makalipat sa ginibong tent city en kaso man na maglala pa an sitwasyon kan bulkan.
Mientrastanto, nangapudan man si Volante sa gobierno asin National Housing Authority na ipadagos an validation sa mga apektadong residentes na kinakaipuhan na permanenteng ilipat sa NHA Project katakod kan nagpapadagos na aktibidad kan Bulkang Mayon.
