Sienerto kan Philippine National Police (PNP) sa publiko na bastante an saindang mga personahes asin gabos nin kinakaipuhang resources nganing magtabang sa pagmamantinir nin katoninongan asin kaayusan sa bilog na nacion, partikularmente na sa katahawan kan ikakasar na tolong aldaw na tigil-pasada na mapuon ngonian na Martes, December 9, 2025.
Segun ki acting PNP Chief, Police Lieutenant General Jose Melencio Nartatez Jr., tolos na siyang nagtao nin direktiba asin sinugo an gabos nin police commander sa manlaen-laeng rehiyon asin probinsya na makipagkoordinar nin harani sa mga lokal na gobierno asin iba pang ahensya kan gobierno para sa sarong pinagsarong asin koordinadong tugon.
Obheto kan lakdang na ini na mabawasan an potensyal na epekto kan transport strike sa publiko, orog na sa orolay kan transportasyon asin seguridad.
Magigiromdomang kan nakaagi inanunsiyar kan transport group na MANIBELA an saindang planong magsagibo nin sarong nationwide transport strike na madurar puon December 9 hanggang 11.
Ini bilang protesta sa saindang pig-aagrangay na sobrang halangkaw na multa na ipigpapataw sainda, asin an haloy na pagproseso kan mga kinakaipuhan na dokumento sa manlaen-laeng ahensya kan gobyerno.
Sinabi pa kan acting PNP Chief na ma-deploy sinda nin kadugangang numero kan mga pulis sa mga pangenot na transport hub sa bilog na nacion, siring man sa mga pangenot na tinampo, asin mga apektadong ruta na posibleng pagdausan ng tigil-pasada.
