LEGAZPI CITY-–Naglunsar an Police Regional Office 5 nin programang KKK o Kabataan Kontra Kriminalidad para sa pakusugon an paglikay sa krimen sa tabang kan mga kajovenesan sa rehiyong Bicol.
Segun ki PNP Bicol Regional Director PBGen Andre Dizon sa intrevista kan Bombo Radyo Legazpi, na an inisyal na KKK gikan sa mga naenot na heroe kun saen an mga kajovenesan iyo an nangenotan sa pagmakulog sa banwaan—kun kaya sa presenteng sitwasyon an mga kaakian man o kajovenesan na may kakayahan na magmakulog sa lugar an pigpukaw ninda an kamalayan para pwedesir sindang magtabang sa pagmantenir kan paz y orden.
Dugang kan opisyal na an mga kajovenesan pwedesir man na mag-report nin mga krimen na saindang nahihiling siring kan domestic violence, cyber crimes, illegal drugs, magin an crimes against person and property.
Ipig-eksplikar ni Dizon na sa tabang kan cyber technology sa panahon ngunyan pwedesir nang magamit ini kan mga kajovenesan para sa pagpartisipar sa naunambitang programa.
Pwedesir man suboot na i-report kan mga kajovenesan kun may mga bayolasyon na piggigibo mapadapit sa pag-ataman kan kapalibutan.
Pigtaram man kan opisyal na pigtawan nindang oportunidad an mga kajovenesan na pwedesir sindang magin heroe sa saindang mga edad.
Dugang ni Dizon na lilibuton ninda an mga lugar sa rehiyon para magkaigwa nin magayon na komunikasyon sa mga aktibidades na makakatabang sa pagmantenir kan paz y orden sa nasyon.
