LEGAZPI CITY — (Update) Inasegurar kan Police Regional Office 5 (PRO5) na masusi asin honestong imbestigasyon an ipigsasagibo kan kapulisan katakod kan pigsasabing kaso kan extrajudicial killing (EJK) sa Albay.
Katakod ini kan pagkakakadiskubre sa bangkay ni Mark “Mac-mac” Obogne sa banwaan kan Polangui, Albay na may mga tama nin bala asin nakagapos sa packaging tape an mga kamot.
Enot naman na nagpahayag an duwang huring nakaibanan kaini makalihis na makulong sa Legazpi City Police Station kun saen anom na pulis an itinukdong nagluwas sa mga ini sa hepatura.
Ipiglibot pa suboot an mga ini sa magkasuway na kotse asin van mantang natutukan nin badil asin nakagakod an mga kamot kun saen magkaibanan an nabistong sinda Briones asin Estipona mantang nasa ibong na lunadan man si Obogne.
Kinaagahan kan Nobyembre 2 kan gadan na ining nadiskubre mantang nakasalbar man an duwa sa insidente.
Sa ekslusibong intrevista kan Bombo Radyo Legazpi ki PNP Bicol spokesperson S/Insp. Ma. Luisa Calubaquib, nagsasagibo na suboot nin validation an PNP sa mga nakukuang impormasyon sa pangengenotan kan Albay Police Provincial Office.
Segun pa ki Calubaquib na pighahalat ninda an resulta kan imbestigasyon para sa magkakanigong aksyon alagad nanindogan na warang mangyayaring ‘whitewash’ o cover up en kaso mapatotoohan an probable cause sa anom na PNP personnel na ipig-iimbwelto sa insidente.
Mientras tanto, nagdulok na man an saro sa mga hudyan na nakaibanan ni Obogne antes na mangyari an insidente sa Commission on Human Rights (CHR) Bicol sa pagsusumiter kan affidavit asin nakikipagkoordinar naman sa National Bureau of Investigation (NBI) para sa ikakaresolber kan kontrobersyal na pagkagadan ni Obogne.
