LEGAZPI CITY – Nagsagibo na man nin mahigpit na monitoring an Matnog Municipal Police Station sa provincia kan Sorsogon makalihis an pagkakakompiska kan P74.8M na kantidad nin pigtutubudang shabu.
Segun ki Chief of Police Police Captain Wilfred Berdin sa intrevista kan Bombo Radyo Legazpi na pigkokonsidera ninda bilang matrayumpo an nasabing operasyon huli sa dakula kan kantidad na nasabat na kontrabando.
Punto niya pa na ginibo ninda kan Philippine Drug Enforcement Agency an lakdang nganing dae na ini maglakop asin maibagsak sa enterong rehiyon pati man sa mga parte kan Visayas asin Mindanao.
Dakulang bagay man suboot an mga nareresibi nindang mga intel report nganing tulos na mabantayan an siisay man na palaog sa rehiyon na nagdadara nin ilegal na droga .
Pigtaram pa kan hepe na isasairarom kan PDEA National Capital Region an duwang suspetsado na tactical interogation nganing maaraman an point of origin kan nasabat na kontrabando.
Pwedesir suboot na nagin kampante an mga suspetsado huli ta nakalaag sana an mga pigtutubudang shabu sa sarong backpack asin pighuna na dae sinda madadakop kan mga operatiba.
Sa hiling niya man na kadakol pa man liwat na nagpoporbar na maglaog nin ilegal na kontrabando sa nasabing pantalan huli ta dae ninda aram na kadakol na mga intelligence operatives na nakalatag nganing i-monitor an saindang hiro para sa magkakanigong operasyon.
Pagsyerto ni Berdin sa publiko na padagos an saindang pagsugpo nin ilegal na droga mantang nagpatanid sa mga ma-porbar na maglaog nin kontrabando sa pantalan na dae sinda mapundo sagkod dae ninda ini napupugo o nasasawata.
