LEGAZPI CITY- Naaresto kan mga otoridad an sarong call center agent na pinagtutubudan na scammer, sa ikinasang joint entrapment operation kan Regional Anti Cybercrime Unit 5 asin Legazpi City Police Station.
Segun ki Legazpi City PNP Acting Chief of Police, Lt. Col. Arthur Tagtag sa intrevista kan Bombo Radyo Legazpi na an nasabing suspek an nagpapabakal nin ATM cards.
Sinabi kan opisyal na an arog kaining mga modus an komon na pig-aaprobitsaran kan mga sindikato.
Ipigpalimbawa pa kan hepe an dakol na kaso kun sain pigagamit an nasabing mga ATM cards sa iligal na mga transaksyon siring kan sa casino asin iba pang mga aktibidad.
An nasabing suspek an mahahampang sa kasong pagbayolar sa Section 5(d) kan Republic Act No. 12010 o an Anti-Financial Account Scamming Act na may koneksyon sa Section 6 kan Republic Act No. 10175 o an Cybercrime Prevention Act of 2012.
