LEGAZPI CITY- Pighihiling na kan nagkapirang kongresista an implikasyon kan pormal nang pagpapadara kan Pilipinas sa United Nations (UN) kan notice of withdrawal sa Rome Statute na nagkrear sa International Criminal Court (ICC).
Sa intrevista kan Bombo Radyo Legazpi ki Albay First District Representative Edcel Lagman, pinatutsadahan kaini si Presidente Rodrigo Duterte na garing nagpapahiling sana suboot kan admission of guilt or culpability asin pag-ibitar sa imbestigasyon kan ICC kaya ginibo an lakdang.
Dugang pa ni Lagman na ‘overwhelming’ kaya suboot an mga ebidensya kontra sa pinakahalangkaw na opisyal kan republika sa records kan pigtutubudang extra judicial killings sa ipinapaotob na ‘war on drugs’.
Afuera kaini, nahahadit man suboot si Lagman sa kun siisay pa an mabantay sa atrocities sa nacion siring man sa padagos na bayolasyon sa rule of law asin direchos urog na an ICC an bastion sa protection of human rights.
Katakod pa kan nasabing lakdang, segun ki Lagman na wara nang ipapahiling na pandok an Pilipinas sa international community huli ta dae suboot tataong-maghonor sa commitment na makakaapektar man sa tiwalang itatao kan mga ini sa nacion.
